Un recht het häi. Niäm wi mol an, de nigge Schützenkönig oder Bierkönig kümmt van nar Sprungbachstroaten und de chanze Vereen möt dür de Sprungbachstroaten laupen. De Lüe werdn dann vannen hen- un herdabern up düsse Stroat oll besupen, van wegen de "Verkehrsberuhigungszonen" dorup. De brukt auk chokäin Schluck Wachollern mahr und dann is dat med de Tradition auk inne Mäse. Dorümme kann man blaut hopen, dat de Dalbker ehre Schlinghofstroaten nich aukno so terechte maket - met Bloumenpott rechts un Pömpel links un inne Midden ne Insel.

Süss maut de Schützken in Taukunft blaut ümme ehren Schützkenplatz maschieren, domet dat Folk säi säin kann un huldigen, so wi sik dat hoiert. Et is in den lesten Joahrn nich äinfach west, de Telte un Sääle vull Lüe to kriägen un junge Minsken to begeistern för dat Schützkenliäben.

Oaber ollet wat recht is, use Schützkenvereen hat sik wat infollen loaten. Säi het dorümme vör Friddag vörn Schützkenfeste nen "Discoabend" inricht. Makt säi nun nen poar Joahr oll. Un dat klappt gannig goat, do is ornek wat los, do loat säi de Puppen danzen. Un nich blaut junge Lüe goahn do hen, nei, auk de Aulen kümmt do noch mol so richtig in Schwung. Un wenn son aulen Kerl son junget knackiget Lüid inne Möchte kümmt, dann föhlt häi sik just as in sienen besten Joahrn.

Wat donoch kümmt,is dochegal, dovo is dann dat äigen Wief wiär taustännig. Oaber makt nix. Villichte kümmt de aule Tied wiar, wenn wi aulen nen biertken tohaupe rücken dait.